Avûkatanê Rayberê Şarê Kurdî Abdullah Ocalanî CPTyî reyde pêvînayîş kerd. Avûkat Îbrahim Bilmezî vat înan waşt wa cade heyetêk şiro Îmrali.
Avûkatê Rayberê Şarê Kurdî Abdullah Ocalanî yê ke bajarê Strasbourgî yê Fransa de dezgehanê Yewîya Ewropa reyde pêvînayîşan kenê, Komîteya Vergirewtişê Îşkenceyî (CPT) reyde pêvînayîş kerd.
Avûkat Îbrahîm Bilmezo ke tewrê pêvînayîş bi vat, ”Ma nê pancşemeyî pêvînayîş kerd. 1999î ra nata ma gama ke firset vînenî CPTyî reyde pêvînayîşan kenê. Eke ma pêvînayîş mekerê zî ma hîrê aşman de hey derheqê qewimîyayîşanê Îmraliyî de rapor danê înan. Ma narey zî na çarçewe de pêvînayîş kerd.”
Bilmezî wina dewam kerd: ”Ma derheqê rewşa Îmraliyî de zanayîşê peyênî teqdîmê înan kerdî. Ma vat nizdê hîrê serran o ma xebere nêgenê , coka ma zî şarê kurdî zî qerqilîyeno û na rewşe komelê Tirkîya ser zî tesîro xirab keno. Ma waştişê xo vatî. Ma vat derheqê weşîya Birêz Ocalanî û muwekîlanê ma de zî xebera ma çîn a û ma waşt CPT raporê xo yê zîyaretê peyênî eşkera bikero.
Ma vat, xora rapor bêro eşkerakerdene zî hinî raporo aktuel nîyo. Coka ganî CPT ra heyetêk têna semedê rewşa weşîye bo zî ganî cade Îmraliyî zîyaret bikero. Înan zî ma goştarî kerd waştişê ma not girewtî û vat ê do endamanê bînan ê komîte de qisey bikerê. Ê tim eynî cewabî danê ma, vanê ê goreyê şertanê xo derheqê pêvînayîşê bi hukmatê Tirkîya nêeşkenê zanayîş bidê. La nê vanê, ‘Îmrali tim rojdemê ma de yo.’ Îdarekaranê CPTyî vat înan derheqê rewşa Îmraliyî de xeylêk zîndanê Tirkîya ra zî mektûbî girewtî.”
Bilmezî qiseykeridşê xo bi nê vatişan qedîna: ”Ma Strasbourg de Konseya Ewropa de welatanê cîya cîyayan ra grûbanê cîya cîyayan ra parlamenteran reyde zî pêvînayîşî kerdî. Ma înan rê zî qala rewşa Îmraliyî kerd ke tira xebere nîna girewtene. Nê parlamenteran ra tayînan na rewşe kirişte rojdemê Heyetê Pêroyî. Ma nê muhîm vînenî, ma do nê xebatanê xo bidomnê. Çunke temsîlkar û parlamenterê bi desan dewletan ê Konseya Ewropa tîya yenê têhet. Bi nê pêvînayîşan ê zî na bêhuqûqîye vînenê.”
