Meşa dirêj a 25 rojan ji bo azadiya Rêber Abdullah Ocalan ji paytexta Fransa Parîsê heta Strasboûrgê dest pê kir.
Li Kolana La Fayette ya Buroya Enformasyona Kurdistanê ya Parîsê ku di sala 2013’an de 3 jinên Kurd ên şoreşger lê hatibûn qetilkirin, daxuyaniyek çapemeniyê hat dayîn.
Çalakgerên bi unîformayên sor ên ku wêneyê Rêber Abdullah Ocalan li xwe kiribûn û pankarta “ji Abdullah Ocalan re azadî ji pirsgirêka Kurd re çareseriya siyasî” hilgirtin.
KCDK-E: EV ÇALAKIYEKE DÎROKÎ YE
Hevseroka KCDK-E’yê Zubeyde Zumrut di daxuyaniya
çapemeniyê de meşa 25 rojan weke “çalakiyeke dîrokî” bi nav kir.
Zubeyde Zumrut diyar kir ku wan bi 25 kesan dest bi meşê kirine û got ku li cihê ku yek ji damezrînera PKK’ê Sakîne Cansiz, Nûnera KNK’ê ya Parîsê Fîdan Dogan û endama Tevgera Ciwanên Kurd Leyla Şaylemez di 9’ê Çileya 2013’an de hatin qetilkirin, dest bi meşê kirin.
Zubeyde Zumrut anî ziman ku heta ronîkirina vê komkujiyê û darizandina berpirsyaran wê têbikoşina xwe bidomînin û bêdengiya navneteweyî ya li hemberî tecrîdê jî şermezar kir. Zubeyde Zumrut bi taybetî bal kişand ser bêdengiya Komîteya Pêşîgirtina Êşkenceyê (CPT) û banga “Nebin alîgirê êrîşên qirkirinê yê dewleta Tirk a ku li ser Kurdan dimeşîne.”
Serokê Konseya KCDK-E Mûrat Ceylan diyar kir ku ew komploger, hevkar û dagirkeran şermezar dikin û bal kişand ser berpirsyariya navneteweyî ya li ser tecrîdkirina Abdullah Ocalan.
Piştî daxuyaniya çapemeniyê çalakgeran dest bi meşê kirin. Di meşê de bênavber dirûşmên ji bo çareseriya pirsgirêka Kurd û azadiya Abdullah Ocalan hatin berzkirin û bi berzkirina dirûşmeyan êrîşên dagirkeriyê yên dewleta Tirk şermezar kirin. Pankarta “Dem hatiye” ya li pêşiya meşê bal kişand. Di pankartê de daxwaza bidawîkirina tecrîdê û azadiya Rêberê Gelê Kurd Abdullah Ocalan hate kirin.
Piştî meşên roja ewil û roja duyemîn li herêma Parîsê, wê li Lorient, Vannes, Nantes, Rennes, Rouen, Mantes La Jolie, Les Mureaux, Meulen, Grigny, Villeneuve St. Li Georges, Bobigny, La Courneuve, Drancy, Soisson, Reimes, Sarcelles, Nancy, Creîl, Metz û Amiensê jî meş bên lidarxistin. Hin ji van meşan wê ji bo piştgiriyê bin, hin jî wê li ser rêya çalakgeran bin. Di meşê de dê qert bên şandin, serdana komên siyasî û saziyên sivîl bên kirin, pêşandana fîlman, civînên gel, şano û gelek çalakiyên din bên lidarxistin.
Meş wê di 15’ê Sibatê salvegera komploya navneteweyî ya li dijî Rêberê Gelê Kurd Abdullah Ocalan de li Strasboûrgê bi dawî bibe.
